حوار:علي الشيخ
تتعدد المواهب والفنون في العصر الحالي كثيرًا، وكلما نجد من يهتم بهم أو يظهرهم على الساحة، على الرغم من أن الفن موهبة عظيمة لايمكننا التغاضي عنها حتي ولو كانت في بدايتها، ولهذا سوف نتحدث عن شاب لديه شغف بالرسم، يتمتع بالإرادة والعزيمة ولديه الإصرار لتحقيق حلمه.
-في البدايه عرفنا بنفسك؟
أسمي مؤمن ايهاب سمير، 18 سنة من القاهرة، مدينة الشروق، بدرس في كلية الزراعة جامعة عين شمس الفرقة الأولى قسم هندسة زراعية.
-متى بدأت في مجال الرسم؟
بدأت في مجال الرسم من حوالي أربع سنين بس بدأت أهتم في سنة 2019 في فترة الثانوية العامة.
-حدثنا عن إنجازاتك التي حصلت عليها؟
الحمدلله رب العالمين كانت بدايتي كنت برسم رسومات 3d وبعد كده بدأت في رسم البورتريه سنة 2020 ومع كل رسمة بدأت أتطور في الرسم ولسه فيه كتير بعد كده بإذن الله.
-ماهي الصعوبات التى واجهتك؟
لما بدأت أرسم شخصية من شخصيات هاري بوتر وكانت صعبة جدا عليا بجد بس الحمدلله خلصتها الحمدلله وكمان ناس كتيرة مهتمتش برسوماتي وكنت يائس جدا وفكرت أني أبطل رسم بس فكرت بعد كده وقولت أرجع تاني وأكمل لحد ما أوصل لحاجة كبيرة إن شاء الله.
-ماهو حلمك المستقبلي؟
حلمي أن اكون رسام مشهور بجد ويكون ليا معرض أعرض فيه كل رسوماتي، وأهم من ده أني أكون راضي لأخر يوم في حياتي.
-هل الرسم اثر سلبا على دراستك؟
لا خالص أنا مخلي الرسم بعد ما اخلص مذاكرة أو في وقت فراغي، لكن الرسم مأثرش سلبيا على دراستي وجامعتي الحمدلله على كل شيء.
-من هو مثلك الأعلى في الرسم؟
مثلي الأعلى الرسام العظيم بيكاسو وحبيت جدا لوحاته بجد.
-وجه نصحية لكل البدائين في الرسم؟
عايز اقول نصيحة لكل الرسامين وهي الإستمرار والممارسة كتيرة هما سر نجاح في الرسم أو أي هواية من أجل التطوير.
-وفي الاخير هل تحب إضافة شيء؟
والله عايز أشكر للناس اللي ساعدوني بجد، وخلوني أتطور وأوصل للمستوى ده وأشكر للرسامين الموهوبين اللي معايا بجد ولازم أشكر الرسام أستاذ كريم عادل وتعلمت منه حاجات كتيرة بجد.
