حوار : حسناء جبل
الفنون دائماً ما تلعب دوراً مهماً في المجتمع الإنساني، حيث تجعل الإنسان أكثر رقياً، ودائماً ترتبط بالإبداع والعبقرية، لذلك أهمية الفنون تكمن في حياة الإنسان بـ: إشباع الرغبات الروحية، ولذلك يتشرف موقع الانطلاقه نيوز بإجراء حوار صحفي خاص مع المطرب الفني المتألق صفوت حسام .
– ممكن تعرفنا بنفسك؟
اسمي الفني صفوت حسام من مدينة الإسكندرية.
– اكتشفت موهبتك وإنت عندك كام سنه؟
إكتشفت موهبتي من صغري، وأنا بعمل على تنمية أي موهبة عندي حتى الموهبة الفنية، ومكنش حد بيدعمني وطبعا مقصدش أهلي بالعكس هما دول الناس الوحيدة اللي كانت بتشجعني، لكن الناس المتخصصة في الفن سواء في المدرسة أو في أي مكان كنت بطلب مساعدتهم للأسف كانت بتمشي بالواسطة، فقررت أعتمد على نفسي وأنتج لنفسي وأظهر موهبتي لنفسي ، وللجمهور والحمدلله كل خطوة بتعلم فيها من أخطائي للأحسن.
-أيه أول كليب ليك؟ وأي فكرته؟
أول كليب:
أغنيه اسمها” كل يوم”، إخراج المخرج حسام بدران، كلماتي وألحاني، وتوزيع عمرو عبد الفتاح، وميكس وماستر ماهر صلاح.
-فكرته:
فكره الأغنيه عن الزوجه الانانيه المستغله اللي بتحب نفسها بس وكنت بقولها كام نصيحه عشان الحياه تبقي احسن ، لكن نوع الموسيقي غربيه علي استايل اللاتن وعملتلها نسخه تانيه لنفس الاغنيه بنوع موسيقي مختلف .
-لازم كل شخص يقابله عقبات في طريقة.. أي هي الصعوبات اللي واجهتك؟
اه طبعا انا احبطت كتير ولازلت بيجيلي احباط، ولكن الصح اني اكمل واتعلم من اخطائي اللي فاتت زي ما قولتلكً اللي في الوسط الفني مش هيساعدوك هما بينحتوكً وبيكرهوك في الفن، غير رأي بعض الجمهور ممكن يحبطك لان طبيعي مش كل الجمهور هيحب اغانيك لان الاذواق مختلفه.
-مين أكتر شخص كان بيدعمك دايما؟
اكتر شخص بيدعمني هما اهلي والله واصحابي اللي بيحبوني كلهم بيفرحولي، الحمد لله لما بعمل اغنيه حلوه ،وكمان ابن خالي دائما بيساعدني ومعايا في كل اغنيه .
-هدفك الأساسي إنك تكون مطرب ولا صدفة؟
هدفي الاساسي اني اكون مغني مختلف، واني اعمل اغاني راقيه تعجب الجمهور وتكون مختلفه شويه عن المعروض عشان الجمهور ميزهقش .
– غنيت أغنية إسمها” أنا مصري” كان أية الغرض منها أو فكرتها؟
اغنيه” انا المصري” من كلمات أحمد صواف وألحانه، هي اتعرضت عليا في رمضان كنت ساعتها مخلص اغنيه” انا مين”، ولسه بنزلها وكان وقتها الناس كلها متابعه “مسلسل الاختيار” ،وعندهم حماس وطني فقولت انا معملتش أغنيه وطنيه قبل كده، وقررت اعمل الاغنيه بالاستايل بتاعي والحمد لله عجبت الجمهور وحققت 2 مليون مشاهده وقتها علي الفيس واليوتيوب ، بس حاولت اعرضها علي الراديو لكن فشلت .
-طبعا عرفين إنك أهلاوي..بيبقا أيه إحساسك لما الأهلي يكسب؟
انا اهلاوي جدا جدا انا واهلي،و بنفرح طبعا لما الاهلي يحقق بطولات ،وبحب اسلوب لعبه جدا وبشجع ليفربول عشان “محمد صلاح” ،انا بفتخر بيه جدا ودائما كنت بفتخر بكل المحترفين زي ميدو، وزيدان وطبعا بعشق “ابو تريكه” .
-ليك كليب إسمه “معنى الحب” هل الكليب ده صدفة ولا كان في شئ يستدعي إنك تقوله؟
اغنيه “معني الحب” كتبتها صدفه لان عمري ما كنت حبيت قبلها قبل كده ، بس دائما الشاعر والملحن لمًا يتفرج علي فيلمً او يشوف حد رومانسي مثلا بيحس بنفس الشعور ، وبعدها يترجم الشعور ده لاغنيه حتي لو كان مش بيحب ابدا .
-أي مطرب في بدايته بيواجه إحباطات كثيرة تقوله أيه ليه من خلال تجربتك؟
أنا فعلا ممكن اكون عملت اخطاء والجمهور مغفرهاش، بس لازم ما ازعلش واتعلم منها واكمل بس اصحح الغلط، وأحب أقول للوسط الفني ان الفن رساله لو هتتعاملوا معاه باستهتار او باسلوب النحت بس، للأسف الفن هيهبط ومش هيطلع تاني حاولوا تتعاونوا شويه مع المطربين الصاعدين، لان انتوا بتموتوهم من أول سلمه وبتقتلوا طموحهم وربنا يهدينا جميعا .
-بتفكر تعمل ايه في الفترة الجاية؟
انا حاليا شغال علي ألبوم كامل وده أول مره اصرح بيه، حتي معرفتش جمهوري اللي علي صفحتي بالمفاجأة دي وباذن الله هيبقي ألبوم مختلف واتمني يبقي انطلاقه ليا للنجاح، واتعاملت في الألبوم مع شعراء وملحنين مختلفين زي احمد صواف اللي عمل اغنيه “وحشاني”، ” وانا المصري” ومحمد جمال ومداح ورسلان ومحمد حزين وفيه ناس تانيه لسه بستقر علي باقي الاغاني معاهم ، بس انا متاكد ان الألبوم هيعجب الجمهور لان تعاملي مع الالبوم ده علي انه اخر خيط لنجاحي في الحلم الفني بتاعي وربنا يوفقنا كلنا .
