حوار : أحمد الزاهد_ياسمين درويش
_في البداية ممكن تعرفينا بنفسك؟
أنا ريم عبدالقادر عندي 7 سنين، وبحب التمثيل جدا.
_ازاي دخلتي مجال التمثيل ؟ وهل الموضوع موهبة أكتر ولا تعلُّم أكتر؟
-دخلت مجال التمثيل وأنا عندي سنتين… رحت اوديشن مع أخواتي عملت كاستينج و اختاروني اعمل الإعلان كان أول حاجة ليا، عملت فيه ريأكشن وأنا بتخض ومن بعدها عملت كذا إعلان.
-هو لازم يكون في موهبة ومع الاستمرار بتنمي الموهبة دي وبيتعلم أكثر ازاي يمثل كل دور ويأديه حلو.
_ايه هو أول عمل درامي ليكي؟ وكان مع مين؟
أول مسلسل عملته كان لمعي القط كان عندي أربع سنين عملت دور خديجة مع محمد إمام عشان أنا كنت أصغر طفلة في المسلسل كان دور ملفت وعمل ضجة والناس حبته،وبعد مسلسل لمعي القط عملت سك على أخواتك مع علي ربيع، وقمر هادي مع هاني سلامة، وعملت ضد مجهول وحاجات كثيرة.
مين أكتر حد دعمك وكان سبب في انك تمثلي دور كبير زي دور شيراز ؟
أول الناس اللي شجعوني هما بابا وماما، وفي كثير من المخرجين شجعوني زي الأستاذ عمرو عرفه وهو مخرج لمعي القط قال لي انتي هتخطفي قلوب الناس وكمان الأستاذ رؤوف عبد العزيز كان ديما يقولي شاطره يا ريم وأكثر حد هو المخرج معتز حسام عملت معاه كذا عمل وهو مساعد مخرج ولما فكر يعمل حاجة إخراجه كتب لي فيلم وأخرجه واسمه ريما على اسمي.
_مين اللي اختارك لدور شيراز ؟
بالنسبه لمسلسل ما وراء الطبيعة رشحتني مروة جبريل كاستنج دايركتور للأستاذ عمرو سلامة وطلبني وعملت اوديشن على مشهد من المسلسل فعجبه أدائي وسقفلي وخلي كل الناس اللي معاه يسقفولي وقاللي أنت هتعملي دور شيراز.
_اي هي التحديات اللي واجهتك أثناء تأديتك دور شيراز؟
دور شيراز دور حلو جدا وجديد أنا أول مرة أعمل شخصية كده ورعب، كان الميكاب أصعب حاجة فيها كنت بحط الميك اب في ثلاث ساعات وأشيله في ساعتين يعني بياخذ شغل خمس ساعات غير وقت التصوير بس انا عشان بحب التمثيل كنت بستحمله والناس اللي معايا كانوا لطاف قوي فكنت ما مبحسش بالوقت وبرده كانت أماكن التصوير صعبة يعني انا صورت في الصحراء وفي نار حقيقية و على سور بلكونه بس كان عمل حلو وأتمنى أعمل جزء ثاني منه.
_رد فعل أهلك كان أي بعد النجاح الباهر لدور شيراز ؟
انبسطت جدا برد فعل الناس على المسلسل وعلى شخصيه شيراز بالذات وفخورة جدا اني عملته واشتغلت مع أستاذ عمرو سلامة ومع نتفليكس و مبسوطة أن عائلتي وأهلي مبسوطين وفخورين بيا و ما كانوش متوقعين النجاح ده واني ابقى ترند على السوشيال ميديا.
_بتخططي لاي في الفترة الجاية ؟
الفترة اللي جاية إن شاء الله داخلة مسلسل في رمضان اسمه خلي بالك من زيزي مع أمينة خليل ومحمد ممدوح وأتمنى إن شاء الله إني أعمل حاجات تعجب الناس وأدوار يحبوها وتعلم معاهم زي شيراز.
