- حوار:إبراهيم المريودي
تعتبر أميرة البيلي، من أنجح الشعراء في الوقت الحالي رغم صغر سنها ،حيث تمتلك العديد من المتابعين على صفحاتها في مواقع التواصل الإجتماعي وبعد نجاح ديوان “من نصيبنا” أصدرت “هنتقابل”.
كما وصلت صفحتها علي الفيسبوك إلى 4 مليون متابع ،نظرًا لإسلوبها المتميز في كتابة وإلقاء الشعر ،إضافة ألى خفة ظلها ،ورقتها في التعامل مع جماهيرها ، التي لطالما تحرص على سماع أرائهم والرد عليها .
ويتشرف موقع “” بإجراء حوار صحفي مع النجمة أميرة البيلي ، وجاء سير الحوار كالتالي :
– ما هو رئيك في معرض الكتاب هذا العام ؟
تنظيم معرض الكتاب السنة دي لطيف جدًا طبعًا ،وبنحاول إننا نحافظ على سلامة الناس ،وبصراحة مجهود عظيم .
– من وجهة نظرك ممكن الكتاب الجديد” هنتقابل” يحقق نجاحات أكتر من ديوان ‘من نصيبنا’ ؟
أعتقد أن “هنتقابل” هيحقق نجاحات أكبر من ديوان ‘من نصيبنا ‘.
– تفتكري إيه سبب إعجاب الجمهور بالكتاب الجديد والإقبال على شرائه من وسط كل الكتب اللي في المعرض ؟
أظن المضمون وإسم الكاتب ،وكنت أعلنت في فيديوهاتي على إن المضمون مختلف المرة دي ، كمان الغلاف جميل جدًا ، مصمم الغلاف إسمه “ساندوبي”.. الحقيقة الراجل ده عمل غلاف جميل جدًا ، حتى لو فلان مايعرفش مين أميرة فهو ممكن يشتري الكتاب علشان الكڤر حلو ، وطبعا كلنا نعتقد إن إسم الكتاب بيبيع أكتر .
– هل ناوية تشتري كتب النهاردة من المعرض ؟
أميرة البيلي: مشترتش كتب من المعرض ،بس أكيد هحب أشتري لزمايلي .
– كم أخذ منك “هنتقابل” وقت لإكماله ؟
أنا كنت بكتب كل شهر قصيدة ؛لأني كنت مشغوله جدًا الفترة اللي فاتت ، وبعدين جمعت كل القصائد وحطيتهم في ديوان هنتقابل .
– رسالتك إيه للكتاب الجدد؟
أتمنى إن هما يكملوا ويجتهدوا ويسعوا، وربنا يوفقهم جميعا ،وأتمنى إن كل اللي عنده موهبة يسعى ويجتهد إنه يحققها ودا شئ مهم ،وأتمنى إن إحنا منجيش الدنيا ونمشي منها وإحنا معملناش حاجة يعني ، فدي رسالتي لكل الشعراء والكتاب الجدد ..إسعوا واجتهدوا وعافروا وحاولوا ،وأكيد هتوصلوا في يوم من الأيام .. (إن الله عند ظن العبد به) .
– حابه تقولي إيه لجمهورك من خلال موقعنا (الإنطلاقة نيوز) ؟
حابه أقول لجمهوري شكرًا جزيلًا على الإقبال الجميل النهاردة ،كنت مبسوطة جدا إني كنت معاكم وكنت أتمنى أتصور مع الكل ،وكنت أتمنى أقعد وقت أطول ؛ولكن احترامًا لقرارات معرض القاهرة الدولي للكتاب ،إن احنا نحافظ على سلامة الناس ،فطبيعي كان لازم أمشي بدري ،وطبيعي كان لازم أحاول اقلل بقدر الإمكان من التجمعات ،فأحب أشكرهم على إنهم جو وحضروا ،وأحب أسمع رأيهم في الديوان .. وهستنى رأيهم بإذن الله في الديوان .
