يبدو أن النجاح أصبح حليف الفنان الكبير خالد سرحان ، حيث طرق النجاح بابه خلال موسم رمضان المنصرم عن شخصية “حسن بن الشيخ سلام” الذي قدمها في “المداح” وعلى النقيض دور “رفعت الدهبي” في “اللي مالوش كبير” .
وتحدث الفنان خالد سرحان عن كواليس شخصيته في “اللي مالوش كبير “، وكشف عن تقديم الجزء الثاني من المداح بالإضافة إلى تعاونه مع الراحل سمير غانم …، في حوار خاص لـ “” تكشف تفاصيله السطور التالية:
نهاية رفعت الذهبي لم تعحب البعض.. وهل توجد هذه الشخصية بيننا ؟
رفعت الذهبي شخص جبار مش جبان حتى في عز ما كان الخديوي مكسر الدنيا وعلى الله حكايتك،هو كان بيقوله لأ اللي جاي أحلى.. وشخصية رفعت موجودة بيننا.
تداول بعض الأخبار عن حدوث مشاكل بين الفنانة ياسمين عبد العزيز والكاتب عمرو محمود ياسين بشأن نهاية المسلسل؟
أنا ماحضرتش الكواليس دي ، جالي ورق الفينال ، أنا آخر حاجة سمعت عن المشاكل دي ، لكن أنا روحت عملت دوري ومشيت وروحت وبس ، لأن عمرو محمود ياسين كتب مسلسل حلو جدا لياسمين ، وياسمين عاملة معاه تاني مسلسل وهما الاتنين نجحوا مع بعض، وأتمنى لو هما فيه أي خلافات تنتهي وأتمنى أن هما يرجعوا يشتغلوا مع بعض تاني .
تعرضت الفنانة ياسمين عبد العزيز بعد نجاح المسلسل لهجوم لاذع..بما ترد على منتقديها ، سواء بين ريهام حجاج وبوسي شلبي أو غيرهم؟
أنا مش بحب ذكر الأسماء بعينها خالص،ولا هتكلم عن الموقف الشخصي دا بشكل عام، أنا بتكلم عن أن فيه نجمة اسمها ياسمين عبد العزيز ونجمة كبيرة، لازم يراعى دا، ياسمين عبدالعزيز لها تاريخ تاريخ سنين فاتت، اللي مش فاهم أن ياسمين نجمة يتابع التاريخ .
“اللي مالوش كبير” يتقال عليه نمبر وان السنة دي ؟
عشان ما اظلمش حد هو دائما الحمد لله كنت بلاقي المسلسلين في التصنيف من العشرة الأوائل، مرة دا الرابع مرة دا السادس كدا يعني، والمداح كان بيتعرض في قناة واحدة (النهار – Viu) ، ومش كل الناس عندها الأبليكيشن “Viu” ، فكانوا بيتفرجوا على النهار ، هو زود من نسبة مشاهدات النهار، خلى النهار يمكن السنة دي غير السنة اللي فاتت لأنها صنفت من القنوات الخمسة الأوائل الأكثر مشاهدة بسبب المداح.
عمرك في حياتك لجأت للمداح ؟
خالد سرحان أعوذ بالله، لأ العلاقة بيني وبين الله سبحانه وتعالى، عمري ما بحب ألجأ لوسيط أبدا .
بشكل عام فكرة الجن والعفاريت شغلاك، يعني أنت ممكن تدور فيها أو تهتم بيها ؟
لأ ماهتمش بيها، لكن أؤمن بكل ما ذكر في القرآن الكريم ..والسحر ذكر في القرآن.
ما تفاصيل المداح 2 ؟
المداح 2 لقيت من الكُتاب قوة وأمل أن هما هيعملوا حاجة أقوى من الحزء الأول ،فأنا أثق في أمين جمال ووليد أبو المجد جدا ومحمد أبو السعد.
ماذا عن أصعب المشاهد التي واجهتك أثناء تصوير “اللي مالوش كبير”؟
مشاهد مسلسل “اللي مالوش كبير” أغلبها كانت صعبة.
القلشة اللي عملتها على محمد رمضان قلبت الدنيا؟
أنا ما بعملش قلش على حد .
فكرة البنك لما كلمني على نفس الراك؟
خالد سرحان أنا ماليش أي علاقة ولا أقصد حد،أنا راجل بيحب الكوميديا والسخرية من الواقع الأليم اللي احنا بنعيشه، دي كانت سخرية عادية زي أي كوميك بعمله أو أي حاجة وبخاطب فيها ناس،بخاطب فيها الناس البسيطة،الناس اللي ساعات ما بتلاقيش قسط العربية الصغيرة اللي بتبقى عايزة تمشيها،أو قسط التاكسي أو قسط الميكروباص أو أي قسط،يعني احنا شعب بقى فيه وسطاء كتير ومش ناقصين استفزاز من حد بالعكس عايزين صورة كويسة للفنان ياخد بإيدهم كدا ويحسسهم أنه هو منهم.
ماذا عن مصير الجزء الثاني من فيلم حريم كريم؟
مشروع العمل متوقف حاليًا.
نسرين طافش أعلنت منذ أربعة أيام عن تقديم جزء ثان من المداح.. فيما نفت في نفس اليوم عن تعاقدها بشكل رسمي كيف ترد على ذلك؟
لا يستطيع أحد أن يعلن عن دخوله العمل إلا في حالة التعاقد الرسمي مع بطل العمل..حمادة هلال شوق الجمهور ب “انتظروا” لكنه لم يتعاقد حتى الآن ومش من حق أي فنان يعلن غير لما البطل يتعاقد بشكل رسمي.
أكثر شيء يفتقده الفن المصري؟
في الوقت الحالي اكتشاف المزيد من الوجوه الجديدة.
رحل عن عالمنا العلامة الكوميدية المسجلة الفنان سمير غانم حدثنا عن تعاونك معه؟
الفنان سمير غانم كان بالنسبة لنا أب وأنا بعتبره هو والمدام رجاء الجداوي السبب الرئيسي في نجاح مسلسل “يوميات زوجة مفروسة” وأستاذ كبير له قيمة فنية كبيرة حافلة بالإنجازات.
العمل الذي لم تقدمه وتتمنى أن تقدمه؟
هو مش عمل واحد لسه عاوز أعمل أعمال كتير وبعتبر نفسي لسه ماقدمتش أعمال كتيرة.
هل يوجد أي تعاقدات على أعمال قادمة؟
لا يوجد أي تعاقدات حتى الآن.
