حوار: أحمد الزاهد
_في البداية كابتن كابونجا عرفنا بحضرتك؟!
انا إسمي«أشرف محروس» الشهير بأشرف «كابونجا» مواليد الإسماعلية عشت في العراق 16 سنة في طفولتي جيت من العراق وأنا عندي 16 سنة و حالياً ساكن بعزبة العقادة أبو سطول فايد.
_كابتن كابونجا كلمنا عن المصارعة الحرة؟!
المصارعة عموماً ليها 3 أجزاء كانت بدايتها من قديم الزمان بدأها رمسيس الأول كان رياضي جداً بدأ يكون في اشتباكات، وبدأت تاخد الشكل الجمالي فبدأت مصارعة التيران وبعد ذلك مصارعة البشر مع بعضهم البعض ثم المصارعة لحد الموت بعد ذلك تطورت لحد ما دخلت روما فكان في قتل و خلافات اللى بنقول عليها دلوقتي المصارعة الحرة بعد ذلك أخدت شكل جمالي تطورت بشكل كبير وبدأ التطور في أمريكا وازداد التطور لحد ما أصبحت بالشكل الموجود في عصرنا هذا.
_حضرتك بدايتك كانت إمتى؟!
أنا بدايتي كانت أول ما خرجت من الجيش فأنا كنت مدرب كونغفو وحصلت على بطولات كتير جداً وخدت بطولات جمهورية وكنت في الجيش ولعبت جودو وفي أول شهر خدت الأول على سلاح المدرعات وبعد كدا خدت التالت على القوات المسلحة وبعد كدا لما خرجت من الجيش بدأت أشوف المصارعة عن طريق المشاهدة اتعلمت أنا وأخويا في البيت لدرجة كسرنا السراير ومن هنا بدأت أخد شق المصارعة، ونزلت القاهرة وعملت فريق من 5 أولاد وبنتين ، وبعد كدا كونت فريق و دعمته و مكنتش باخد فلوس من حد لحد دلوقتي ودلوقتي معايا حوالى 50 لاعب ولاعبة وعملت عروض كتيرة في مصر حوالى 30 عرض و سافرنا الأردن عملنا عرض هناك وإن شاء الله هنسافر تاني عشان نعمل عرض مصارعة المحترفين المصرية العربية.
_مين اللى كان بيشجعك دائماً؟!
أكتر حد بيشجعني كانت والدتى والناس القريبة مني وزوجتي.
_مين هو مثلك الأعلى؟!
مثلي الأعلى الرسول صلي الله علية وسلم والانبياء كلهم ثم مايكل جاكسون ومتعلم حاجات كتير منه زي إني أعمل كل حاجه بنفسي.
-أي هو حلمك وطموحك؟!
حلمي أن الإتحاد بتاعي يكبر جدا على مستوى العالم ثم إني أكون أقوى رجل في العالم ودا تاريخ ليا وأولادي ومصر والوطن العربي كله.
_أي هي الصعوبات التي واجهتك في البداية؟!
الصعوبات اللى واجهتني في حياتي كبيرة جدا كنت بسافر من الإسماعلية للقاهرة وكان عند قرايبى بس مش بروح عندهم وكنت بنام فى محطة رمسيس والتحرير في البرد لأن الإنسان بطبعه تقيل وكنت بعتمد على البسكويت أو كان اللاعيبة تجيبلى أكل وهي جاية، وكانت الماديات ضعيفة جداً.
_أي هي مميزات وعيوب المصارعة الحرة؟!
المميزات:- أنها رياضة جميلة جداً وبطلع الطاقة السلبية والإيجابية، وليها مشاهدين تاني مشاهدة في العالم، ومش مربوطة بسن أقل حاجه من 17 أو 18 سنة لحد 60 سنة أو أكتر.
العيوب:-
أنها في الوطن العربي مش واخدة حقها.
_أي هي الأكلات اللى تنصح الناس بيها؟!
الأكلات الصحية اللى أنصح الناس بيها وهي:-
الحاجات الطبيعية زي ( الفواكة و الخضروات اللحوم و الأسماك و الفراخ و اللبن والبيض)؛ لكن متستعملش الزيوت في الأكل، وبنصح الناس كمان أن السلطة والفواكة يفضل أنها تتاكل قبل الأكل بنص ساعة أو ساعة.
_ بتفكر تعمل أي في الفترة القادمة؟!
بفكر الفترة الجاية إني أكسب “موسوعة جينيس” بإذن الله الشهر القادم وعندي عرض في مركز شباب فايد بمناسبة إحتفالات شهر أكتوبر، وشهر 11 عندنا عرض في الشرقية وإن شاء الله هنسافر الأردن، وإن شاء الله هجيب ناس من ال W.W.E و هيكون في دعم للسياحة وتنشيطها في مصر.
_وأخيراً أي هي النصيحة اللى ممكن توجها لكل مبتدأ؟!
النصيحة هي إنك مش شرط تبدأ من سن محدد وابدأ مارس الرياضة كلها مثل ركوب الدرجات وأدخل الجيم ومارس الرياضة كلها.
