بقلم :محمد مصطفى
تعتبر لوحة الصرخة تاني أشهر لوحة في العالم بعد لوحة الموناليزا و من أهم الأعمال الفنية على مدار التاريخ .
ايه بقى حكاية اللوحة دي ، تعالى أنا هحكيلك .
الفنان اللي رسم اللوحة دي هو الرسام النرويجي إدڤارت مونك و رسمها سنة 1893 في النرويج ، عمنا مونك ده رسم من اللوحة دي 4 نسخات ، منهم 2 بالألوان و 2 بالباستيل ، النسخة الأولى بالألوان موجودة ضمن مجموعة المتحف الوطني للنرويج في مدينة أوسلو ، و النسخة التانية و الرابعة ضمن المتحف الخاص بالرسام مونك ، و النسخة التالتة اتباعت في سنة 2012 لرجل الأعمال الأمريكي ليون بلاك ب 120 مليون دولار .
و دي بقى تاريخ رسم النسخ الأربعة من اللوحة :
النسخة الأولى 1893
النسخة الثانية 1893
النسخة الثالثة 1895
النسخة الرابعة 1910
طيب اللوحة دي معناها أيه أو ترمز لإيه ، اللوحة دي بتجسد صرخة شخص واقف على جسر و ملامحه خايفة و باين عليها الفزع و سماء حمراء و بحر مسود خائف .
مونك رسم اللوحة دي بعد تجربة نفسية مر بيها و كتب في مذكراته “كنت أسير في الطريق مع صديقين لي ثم غربت الشمس ، فشعرت بمسحة من الكآبة ، و فجأة أصبحت السماء حمراء بلون الدم ، و انحنيت على سياج بجانب الطريق و قد غلبني إرهاق لا يوصف ، ثم نظرت إلى السحب الملتهبة المعلقة مثل دم و سيف فوق جرف البحر الأزرق المائل إلى السواد في المدينة ، استمر صديقاي في سيرهما ، لكنني توقفت هناك أرتعش من الخوف ، ثم سمعت صرخة تتردد في الطبيعة بلا نهاية”
و الباحثين طبعا شافوا الكلمتين دول و شافوا معالم المكان اللي ف اللوحة فحددوا المكان و قالوا ده خليج أوسلفورد ف مدينة أوسلو جنوب شرقي النرويج.
اللوحة دي بالصلاة ع النبي اتسرقت مرتين ، المرة الاولى ف 1994 لما اتنين رجالة اقتحموا المتحف الوطني في أوسلو و سرقوا نسخة من اللوحة لا و كانوا روشين فشخ فكتبوا ملحوظة “شكرا لسوء الأمن” بس الحمدلله الشرطة النرويجية بالتعاون مع الشرطة البريطانية عثروا ع اللوحة سليمة تماما ، المرة التانية بقى كانت سنة 2004 لما جماعة ملثمة اقتحموا متحف مونك و سرقوا اللوحة بالإضافة للوحة مادونا ، بس برضه الحمدلله الشرطة النرويجية في 2006 عثروا ع اللوحتين دون الكشف عن تفاصيل بس قالوا إن اللوحتين حصل فيهم اضرار بسيطة سهل تتصلح .
اللوحة دي تعتبر من اللوحات المهمة جدا لأنها تعتبر تجسيد حي للقلق و اتقال عنها كمان إنها لوحة لا تقدر بثمن ، حتى لما اتباعت في 2012 زي ما قولنا ف الأول اتباعت بحوالي 120 مليون دولار
و تعتبر اللوحة دي أشهر أعمال مونك على الإطلاق ، و خدت شهرة كبيرة جدا من بعد نهاية الحرب العالمية التانية رغم بساطة اللوحة الظاهرية ، و نقدر نقول ان سبب شهرة اللوحة دي هي شحنة الدراما المكثفة فيها و الخوف الوجودي اللي بتجسده اللوحة .
وتحولت اللوحة دي بعد ظهورها عام 1893 إلى موضوع لقصائد الشعراء وصرعات المصممين .
طبعا أكيد حد هيسأل عن تفسير للوحة دي أقولو لا يابو لسان طويل اللوحة دي ليها كذا تفسير من ناحية إن كل واحد ممكن يكون ليه تفسيره الخاص بس اللوحة دي من شكلها العام كدة نقدر نحدد التفسير ليها من خلال الرعب و الخوف و الألم النفسي و الوحدة اللي ظاهرين في اللوحة ، الرسام نفسه بقى قال إنه سمع صرخة مدوية في الطبيعة بلا نهاية طيب الصرخة دي كانت صرخة كونية من السماء ؟ طيب هل هو لما سمع الصرخة فصرخ هو كمان صرخة رعب دفاعية ؟ المهم من كل ده إن الفنان قدر يبدع في رسم اللوحة مهما كان الغموض و التفسيرات اللي حوالين اللوحة .
