كتب:علي الشيخ
أعربت الفنانة مها نصار إحدى بطلات مسلسل “أحمس” عن استيائها من قرار إيقاف المسلسل وعدم خوضه في السباق الرمضاني المقبل بعد تعرضه لهجوم شديد.
وكتب نصار عبر حسابها الشخصي بموقع التواصل
الاجتماعي فيسبوك:كلام الناس فوق راسي من فوق سواء بالسلب أو بالإيجاب حقك تقول اللي انت عايزه بس علشان احترم كلامك لازم تكون بتتكلم صح وعن وعي ودا مبيتحققش غير بعد المشاهده الجيده للعمل.
وتابعت انا حابه أوضح حاجه صغيره احنا بنعمل عمل درامي مستوحي من التاريخ وليس فيلم وثائقي عن الملك احمس والا كنا هنعمل اللي في التاريخ بالظبط ان الملك احمس اتجوز اخته لان في العصر ده كان جواز الاخوات عادي، لكن احنا بنعمل روايه اسمها كفاح طيبه للأديب العالمي نجيب محفوظ اللي قرأ الروايه هيفهم كلامي كويس..الأديب كان ليه روئيه مختلفه من خياله ودكتور زاهي حواس في كلام سابق لما قرأ الروايه قال انها مستوحاه من التاريخ وليست التاريخ.. فانا مستغربه جدا لكلام دكتور زاهي حواس.
وأردفت دلوقتي مدام المخرج بيعمل روايه من خيال الكاتب ومستوحاه من التاريخ ودا طبعا مكتوب علي المسلسل فمن حقه يبدع ليه نحصر الفن في دايره ضيقه ونلف فيها !!!كلنا التزمنا بالرواية ودا بيحصل في العالم كله ومش جديد أنه يضيف شخصيه جديده يغير شكل الممثلين يموت شخصيه يطلعنا بنطير هو حر ..ولو كنا صبرنا كنا هنلاقي الكلام دا علي التتر.
واختتمت مها الفن للمتعه والحكم دايما بيبقي فيه للجمهور اللي احنا بتشتغل علشانه،واحنا جمهورنا واعي كفايه انه يغير القناه لو حاجه معجبتهوش، وانا بتحدي أي حد انه بعد عرض الحلقه الاولي بس، هيحصله انبهار وتشوق ومتعه وهيكمل المسلسل للآخر، و هيحترم المجهود الضخم الواضح من كل صناع العمل، علشان تبقي ناقد واحترم كلامك وافهمه لازم تكون بتكتب كلام محترم وهادف افهم منه فين اخطائي واصلحها وتضيفلي شيئ جديد ودا مبيحصلش غير بعد مشاهده العمل و في الحاله دي بس لازم اسمعلك لانك هتضفلي شيئ، انا فخوره جدا اني اشتغلت في مسلسل الملك.
مسلسل “الملك” مأخوذ عن رواية كفاح طيبة للأديب العالمى نجيب محفوظ، وسيناريو وحوار محمد وخالد وشيرين دياب، إخراج حسين المنباوى، وبطولة عمرو يوسف، ماجد المصري، صبا مبارك، محمد فراج، ريم مصطفى، محمد لطفي، محمد علاء، مها نصار، باسل الزارو، أمير صلاح الدين، ياسين السقا، معتز هشام.
