حوار:علي الشيخ
لفتت الفنانة منة تيسير الأنظار إليها خلال ظهورها في مسلسل”ملوك الجدعنة” بدور ولاء .
وتحدثت الفنانة منة تيسير عن تقديمها دور “ولاء ” التي تألقت به في مسلسل “ملوك الجدعنة ″ وكشفت عن كواليس العمل وترشيحها للدور، والصعوبات التي واجهتها،وأحب الأعمال اليها، بالإضافة إلى الأعمال التي تجهز لها، في حوار خاص لـ” ” تكشف تفاصيله السطور التالية:
-من رشحك لهذا الدور؟
المخرج أحمد خالد موسى اللي رشحني للدور، كنت هعمل دور تاني قبل الدور دا فحصل ظروف وماكنتش هشتغل تاني وبعدين جالي الدور دا الحمد لله وأنا مبسوطة وبحب دوري جدا.
-بعد تألقك في تجسيد الدور والإضافة له أشاد المتابعين بك فكيف استقبلتي هذه الردود؟
ردود الأفعال كانت غير متوقعة وكنت سعيدة جدا، وماكنتش متخيلة رد الفعل دا، أنا أول مرة ألاقيه بالشكل ده، أنا سعيدة جدا وبحمد ربنا.
-من وجهة نظرك توجد شخصية “ولاء” بيننا؟
شخصية “ولاء” موجودة بينا جدا،واللي هي المبتسمة اللذيذة السمة اللي في العسل دي فعلا موجودة.
-ما هو أصعب مشهد واجهك في التصوير؟
مشهد الضرب إني بغرق ياسمين رئيس بالمياه، كنت قلقانة شوية وماكنتش عايزة أغرقها وماكنتش عايزاها تتعب.
وكان صعب تكنيك إني أرمي عليها المياه وإن احنا نعمل الشوت، كنت متضايقة إني هرميها بالمياه أنا بحبها جدا
.وهي غلبانة ومستسلمة كده وبتقول لي احدفيني بالمياه وما يهمكيش وكده فدا كان بيخليني مش عايزة أحدفها.
كيف كانت كواليس العمل مع الفنانة ياسمين رئيس؟
أنا حبيتها جدا هي جميلة وقمر، واحنا عامة كلنا روحنا حلوة في التصوير وكلنا عيلة واحدة..المسلسل كان متصور في لبنان،كلنا مع بعض طول الوقت يعني من أحلى الكواليس اللي اشتغلت فيها في حياتي في عمل،ما بين كل الممثلين وبعض ياسمين انا حبيتها جدا.
-ما هي الصعوبات التي واجهتك في التصوير؟
مفيش أي صعوبات واجهتني في التصوير .
-حدثينا عن تجربتك مع المخرج أحمد خالد موسى؟
لو لقيت أن المسلسل ناجح أعرف إن “أحمد خالد موسى” السبب الأول، لأنه بيدي طاقة إيجابية وروحه حلوة وبيحب كل الناس وبيتعامل مع أصغر عامل لأكبر نجم بنفس الطريقة، وبيحب كل الناس ومعطاء، وبيحب الممثل وبيحبه يبقى في أحسن حالاته..طول الوقت بيفكر ازاي يصعدك وينجمك وينجحك،فمخرج بيحب المسلسل مش أناني، ومخرج بيساوي ما بين كل الناس مخرج إنسان وفنان، ودا عامل روح كواليس حلوة فبيخليني حتى لو تعبانين ومرهقين ومطبقين وصايمين وتعبانين،بنطلع أحسن ما عندنا لأن هو يعني عمل لنا طاقة كلها حب وطاقة إيجابية جدا.
– كيف تتعامل منة تيسير مع السوشيال ميديا؟
بتعامل مع جمهوري وبتواصل معاه، بحب السوشيال ميديا مش بتضايقني، بحس إن الحاجات دي بتبقى قلبي، بيخرج من القلب بيدخل قلبي، فأنا عشان الناس بتحبني أنا عمري ما بلاقي حاجات بتتقال عليا..عمري ما اتعرضت للتنمر إلا بنسبة 1٪ كل فترات بعيدة جدا، هي اللي بتحسسني إن الناس بتحبني وممتنالي حتى لو قعدت شوية ما جاليش شغل كويس فببقى قاعدة ما بشتغلش تحس إن الناس بتحبني وفاكراني وعايزاني وبوحشهم.
-من وجهة نظرك باستطاعة السوشيال ميديا أن ترفع نجوم وأن تهبط نجوم؟
احنا دلوقتي في عصر السوشيال ميديا، السوشيال ميديا بتنجح وهي التنمومتر واحنا بنقيس القياس،احنا بنفهم نسبة المشاهدات ايه، وبنفهم ردود أفعال الناس ايه، بنسبة 100٪ السوشيال ميديا عليها عامل.
-ما هي أحب الأعمال إلى قلب منة تيسير؟
أحب الأعمال إلى قلبي (ملوك الجدعنة – نصيبي وقسمتك – خيط حرير)
-من هو قدوتك في التمثيل؟
الأستاذ محمود ياسين قدوتي في التمثيل..شاربة منه حاجات في أسلوبه وطريقته ودماغه وثقافته واطلاعه وتواضعه وحبه لشغله والفن وتعاملاته هو قدوتي وهو أبويا الثاني، وهو قدوتي كفنان كبير طبعا ممثل عظيم.
-هل تجهزي لأي أعمال في الفترة المقبلة؟
عندي مسرحية من إخراجي إنتاج الأستاذ كامل أبو علي، شركة بترس هتتعرض إن شاء الله في الصيف، وعندي مسلسل أوف سيزون وفيلم “ساعة شيطان “.
