كتب:علي الشيخ
أعلن مخرج الأكشن محمود طاحون الانتهاء من تصوير مسلسل “اللي مالوش كبير” عبر حسابه الشخصي بموقع التواصل الاجتماعي “فيسبوك “، مصحوبا بـ”فركش اللي ملوش كبير”.
ونشر طاحون صور برفقة طاقم العمل وعلق قائلا:”الحمد لله فركش مسلسل اللي مالوش كبير تعالولي بقى كدة طالما فركشنا”.
كما تابع أولا بشكر رجالة الأكشن اللي تعبوا جدا في المسلسل ده واللي فخور بيهم كلهم رجالة، مدير التصوير أحمد إبراهيم بعتبره أكتر مكسب أنا خرجت بيه من المسلسل واتعلمت منه كمان ومن أهم وأشطر مديرين التصوير في مصر والعالم العربي، المؤلف عمرو ياسين أنا كنت مراهن على نجاح المسلسل من أول ما قرأت الورق قبل حتى ما نبدأ تصوير ، مؤلف كبير ودائما في نجاح يا رب.
وأكمل المخرج مصطفى فكر، أعتقد أن كلمة المخرج الفرفوش رزق اتعملت عشانك، أنت تعبت كتير وجيت على نفسك كتير عشان تطلع للناس المسلسل بالشكل ده، فرحان إننا اشتغلنا مع بعض وفرحان أكتر إننا بقينا أصدقاء ، وإن شاء الله اللي جاي أجمل وأجمل، الفنانة من زمان جدا وأنا نفسي نشتغل مع بعض وكنت من أشد المعجبين، بس بعد ما اشتغلنا مع بعض عاوز أقولك أن إعجابي كمشاهد زاد أكتر بكتير وكواحد من صناع العمل عاوز أقولك أنه شرف كبير ليا إني كنت معاكي في المسلسل، نجمة كبيرة بجد وشخصية غزل من أفضل أعمالك.
كذلك أكمل: الفنان أحمد العوضي، شهادتي فيك مجروحة عشان الناس كلها عارفين أننا صحاب من زمان بس مش هاقول غير أن مفيش ممثل في مصر كان هايعمل الخديوي زي ما انت عملته ،فخور بنجاحك ونجاحنا كلنا يا رب دائما مكسر الدنيا ، على الله حكايتك.
وأنهى: حابب أشكر كل الفنانين والكرو اللي اشتغلوا في المسلسل ده ، وفرحان جدا بالأصدقاء والإخوات اللي كسبتهم من المسلسل ده، وإن شاء الله نتقابل قريب في أعمال جديدة.
يذكر أن مسلسل “اللي ملوش كبير” تأليف عمرو محمود ياسين وإخراج مصطفى فكري وإنتاج شركة سينرجي، وبطولة ياسمين عبد العزيز وأحمد العوضي، وخالد الصاوي، ودينا فؤاد، وأحمد سعيد عبد الغني، ودنيا عبد العزيز، ومحمود حافظ، وإيمان السيد، وأحمد عبد الله محمود، ومحمد عبد العظيم، ومحمود ياسين “جونيور” وحلا زلط.
