أعرب “سيف عيسى” بطل منتخب مصر للتايكوندو عن حزنه الشديد بسبب الهجوم الساذج الذي هوجمت به بطلة التنس “ميار شريف”، بعد خساراتها في الدور الأول بأولمبياد طوكيو.
وعلق سيف في لقاء مع إذاعة صوت العرب قائلاً :”ميار شريف مصنفة ما بين المية والمية وعشرة، وراحت بتلعب بطولة فيها أحسن 32 لاعيبة في العالم.. ليه نتوقع منها إنها تكسب أو تحقق ميدالية، وليه نهجامها إنها خسرت من الدور الأول، ومشكلة كورونا قللت تصنيف اللاعبين المصريين ودا وقعهم في قرعة وحشة جدًا”.
واختتم : يعني مثلا سيف عيسى كان تصنيفه الثالث، علشان ماشاركش وماسافرش الفترة اللي فاتت علشان كورونا نزل تصنيفه السادس، فوقع في طريق الأول في العالم ،لكن لو هو التالت هيروح في طريق التاني ،يبقى فرصته إنه يوصل للنهائي أكتر ، والأول من التاني بتفرق ، نفس الكلام حصل في سلاح الشيش ،شوفنا النهاردة أبو القاسم وقع في سكة صعبة جدا، والدورات الأولمبية أنت بتلعب كل الدورات في يوم واحد، يعني الميدالية بتبقى في يوم، ومن الحاجات اللي زعلتنا جدا محمد عبدالعال في الجودو، كان متوقع له إنه يوصل لمركز كويس أو ينافس على ميدالية لكن خسر من بطل البرازيل في الدور الاتنين وتلاتين، هو كان تصنيفه العاشر وخسر من الـ18 ،ودا غير متوقع، فدا إعداد بدني مش كويس”.
على صعيد متصل حصد سيف عيسى لاعب منتخب مصر للتايكوندو علي الميدالية البرونزية لوزن -80 كجم بدورة الألعاب الأولمبية طوكيو 2020 التي تستضيفها العاصمة اليابانية طوكيو خلال الفترة من 23 يوليو حتى 8 أغسطس.
الجدير بالذكر حقق الفوز على لاعب النرويج اندري ريتشارد في مباراة حسم الميدالية البرونزية بنتيجة 12-4 ليتوج ببرونزية أولمبياد طوكيو.
