أعلنت الإعلامية ريهام سعيد عن شعورها بأنها ستموت قريبا، لذلك قررت الابتعاد عن السوشيال ميديا لتقضي مع أولادها أكبر وقت ممكن.
حيث أكدت ذلك قائلة: أقسم بالله كل حرف هكتبه صادق و من قلبي، أنا حاسة إن أنا هموت قريب عشان كده هبعد عن السوشال ميديا عشان أقعد مع أولادي أكبر وقت ممكن خصوصا ابني الصغير.
سحر أم اكتئاب ؟
وتابعت: يمكن سحر يمكن اكتئاب و يمكن حقيقي، غالبا إحساس الظلم كان بيقتلني بالبطيء في يوم من الأيام، الدنيا قامت عليا عشان تعلب أما المعراج و إنكارها عادي، تامر أمين يغلط في الصعايدة قاصد أو مش قاصد يتوقف 3 شهور لكن أنا أعمل أكبر حملة للسمنة و أعالج آلاف من السمنة و عمليات ببلاش و يفتروا عليا و يقولوا إني قلت إن ريحتهم وحشه و أتوقف سنة.
ريهام سعيد وفتاة المول
وأكملت سعيد قائلة: فتاة المول و لا تحرش و لا نيلة و أجيب فيديو و هي معاه ماحدش يشوفه وأتحاكم و أدفع اللي ورايا و اللي قدامي لسما المصري عشان تتنازل لأن هي اللي زقاها عليا، و غيره و غيره و غيره .
ريهام سعيد وخدمة المجتمع
وعن سعيها لخدمة الشباب قالت: كفاية إننا عالجنا أعداد مهولة من الشباب من المخدرات وروحت أماكن خطر جدا عشان أوعي الناس، بدل ما أتكرم ألاقي نفسي نايمة في أوضة متر في متر مع تاجرة مخدرات.
وقف برنامج ريهام سعيد
وعما نتج عن وقف البرنامج قالت: البرنامج يتوقف أطفال تموت و مدرسة ذوي الاحتياجات الخاصة اللي فاتحينها تتقفل و تطلع ريهام كدابة.. لو فضلت أحكي هحكي كتير بس أنا موجوعة و مش قادرة أحكي، انتوا ظالمين بتمشوا بكلمة من غير ما تشوفوا و لا تفهموا، عندي كلام كتير أقوله على كمية مواقف فيها ظلم رهيب.
وعن مسامحتها لمن ظلموها قالت: لو مت أنا مش مسامحة.. مش مسامحة أي حد قال عليا كلمة واحدة مش حقيقة أو على السمع.. مش مسامحة أي صحفي كتب عني كلمة ظلم، مش مسامحة أي واحد كتب كومنت موت بيه أطفال القلب، كفايه إن أي حاجة الإعلام بيتكلم فيها دلوقتي أنا متكلمة فيها من عشر سنين.
مسامحة ريهام سعيد لـ هاني عزب وحسن شاكوش
وتابعت: هنزل قبري مش مسامحة هاني عزب و لا أيمن سليم و لا ريم و لا بسمة و محمد راضي وعلاء الكحكي ووليد مصطفى و كتير غيرهم، مش مسامحة و لا هسامح، مش مسامحة اللي بتسحرلي كل شوية، مش مسامحة حسن شاكوش و اللي عمله في أولادي، مش مسامحة أي حد ساهم في خراب بيتي و ضياع مجهود سنين و مش مسامحة أي حد أنا معرفوش ضدي و بيحاربني و أنا مش عارفة.
وأكدت سعيد أن ما يشغلها الآن أن تجهز للقاء الله حيث قالت: المهم إني أجهز للقاء ربنا أعوض الصيام و أصلي كتير و أتصدق و أدعي، ادعولي انتوا كمان ربنا يغفر لي.
وتابعت: ريهام بتجيب مشاكل طب وراحت فين المشاكل لما قعدت في البيت ؟ ما هو اللي فيه طبع مابيغيروش وإلا عشان اللي كانوا بيعملوا المشاكل اتهدوا لما اعتزلت ؟ عشان أنا مش على الشاشة ماليش قيمة و مفيش مصلحة قد ايه الناس وحشة.
وأشارت إلى أنها طلب المساعدة من أكثر من شخص لتحقيق حلمها في التمثيل ولكن لم يستجب أحد حيث قالت: كلمت ناس كتير يساعدوني أحقق حلمي وأمثل مش عايزة أقولكم الرد و ناس ياما وقفت جنبهم، كل دور أعمله المخرج يقول لي إنه هيكسر الدنيا بس هي ماشية بالشطارة ؟ أنا عايزة أقولكم إلى اللقاء يمكن لما أخف لو عيانة، يمكن لما أتعالج من السحر لو مسحورة، يمكن في الجنة بإذن الله لو مت.
ووجهت ريهام سعيد نصيحة : ما تظلموش حد لأن أنا بعد ما تعبت اوي اوي ظلمتوني ايوه حتى لو ليا أعداء انتوا ساعدتوهم.
ريهام سعيد توجه رسالة للرئيس
وفي نهاية حديثها وجهت سعيد رسالة للرئيس قائلة: آخر حاجة هوجهها للريس أنا لو مت أمنيتي أولادي يعرفوا أنا حققت و عملت ايه لأن أكيد حضرتك مش عارف.. أنا أولادي اتعذبوا ورايا في المحاكم و القضايا أنا ابني كان عنده شهرين زارني في السجن.
وتابعت: أنا بهدلت أهلي معايا عشان ولا حاجة كنت فاهمة إني هصلح الكون.. أنا آسفة إني نجحت أنا آسفة إني كنت عايزة كل الناس تعمل خير، أنا آسفة إني ماعملتش علاقات تسندني جوه أو بره ، خسارة المجهود اللي راح بدون تقدير لكن أجري بإذن الله عند ربنا، ماتوجعوش حد تاني إحساس الظلم مميت.. احنا كنا البرنامج رقم واحد في المشاهدة في الوطن العربي عشر سنين و السابع على العالم و تعبنا اوي اوي اوي اوي، قدر الله و ما و شاء فعل حقي عندك يا رب .
