كتبت: حسناء جبل
تحدث شوقي غريب المدير الفني لمنتخب مصر الأولمبي عن حقيقة اعتراض لاعبي أولمبي الفراعنة على اختيار محمد صلاح نجم ليفربول الإنجليزي للمشاركة في أولمبياد طوكيو.
وقال شوقي غريب عن رفض اللاعبين انضمام محمد صلاح على هامش المؤتمر الصحفي المنعقد حاليًا في استاد القاهرة: “اللاعب لاعب، ولو كان اللاعب هو اللي بيختار يبقى احنا نقعد في بيوتنا، ده منتخب مصر مش نادي عندي ٣٠ لاعب.. تأكدوا من حاجة.. مصر ليها لاعيبة كتير.. ولو حد خد فرص حد.. انا متأكد انه هيجيد”.
وأضاف “مازلت بضرب مثال.. إنه قبل بطولة إفريقيا اتصاب محمد محمود وكريم نيدفيد وطاهر ومرعي، وكانوا من القوة الأساسية، ولا غنى عنهم لكن لولا اننا كنا بنلاعب كل العناصر التانية مكناش هنلاقي بديل”.
وتابع “أول مباراة تعرض ناصر ماهر للإصابة لكن محدش حس بغيابه الماتشات اللي بعد كده، كما أصيب احمد حمدي ومكانش موجود برضو، وما يمكن اللاعب اللي بيقول ده مش في حساباتي أصلًا.. ساعات نشوة الفرح والانتصار بتخلي اللاعب يحس ان الناس بتاخد منه حلمه وفرحته لما الناس واجهتهم بسؤال عن انضمام صلاح”.
كما استطرد “مستعد اعمل استبيان على الاختيارات في المنتخب محدش يعرف يحط قائمة ومنتخب مصر فيه تنفيذ أوامر مع حب واحترام وتضحية”.
وقال شوقي غريب أيضًا “اللاعبون الاحتياطيون في قائمة الأولمبياد لن يسمح لهم بدخول غرف الملابس ومسموح بالتبديل خلال الأولمبياد حال حدوث إصابات.. بخروج اللاعب المصاب واختيار لاعب من الأربعة الاحتياطي”.
واختتم “القرعة يوم ٢١ إبريل الساعة ١١ صباحًا في مقر الاتحاد الدولي وهنحضرها أونلاين.. احنا قرارنا فني باختيار اللاعيبة لكن الموافقة بتاعة اللاعب والنادي ومديره الفني مهمة”.
