نيللي كريم لـ “الانطلاقة”: كنت على يقين إن المسلسل هيثير الجدل.. وأتمنى تغيير قانون الأحوال الشخصية (حوار)

شارك

فنانة متمكنة صنعت لنفسها مكانة خاصة على الساحة الفنية، استطاعت نيللي كريم أن تكتسب شعبية كبيرة، كان الباليه محطة مهمة في حياتها منذ الصغر حيث تخرجت من معهد الباليه بأكاديمية الفنون، واتجهت إلى الدراسات العليا في قسم إخراج فن الباليه، ثم عملت راقصة باليه بالأوبرا عام 1991، فتجسد جميع الأدوار بحرفية كبيرة ومن خلال هذا الأداء الرائع تجعل المشاهد يتعايش معها وكأن هذا العمل حقيقي وليس مجرد تمثيل. 

– في البداية حدثينا عن شخصية “تونا” في” أمل فاتن حربي”؟

شخصية فاتن ست مصرية عادية زي أي ست بتشتغل ولديها بيت ومتزوجة، وبتطحن في ظروف أعتقد إن نصف ستات مصر لو مش أكتر مطحونين في نفس الظروف دي، و بتواجه مشاكل الحياة اليومية الواقعية جدا اللي بتحصل في نصف بيوت مصر.

مسلسل فاتن أمل حربي
نيللي كريم مسلسل فاتن أمل حربي

– استعنتي بامرأة تعاني من مشكلة فاتن أم لا ؟

على مدار السنين الواحد بيشوف نماذج كتيرة أوي من الحياة يعني بيشوف شخصيات مختلفة كتير وناس عايشة يعني في وسطهم.

– هل تشبه شخصية “تونة” أحد من أقاربك ؟

فيه ناس كتير حواليا.. مافيش شخصية معينة، فيه شخصيات كتير بنفس المواصفات وبنفس الشكل ده يعني.

– ماذا كانت توقعاتك عندما علمتي إن إبراهيم عيسى كاتب السيناريو ؟ 

كنت متوقعة إنه هيكتب حاجة عميقة هيناقش قضية حلوة بذكاء شديد.

– حدثينا عن كواليس العمل مع شريف سلامة و ماندو العدل ؟

سعيدة بالتعاون مع شريف سلامة لأول مرة وشريف يجسد دور مميز ومختلف ومحدش شافه قبل كده بالشكل ده، ولكن ماندو العدل اشتغلت معاه قبل كده، عملنا مسلسل حلو جدا “لأعلى سعر” وحقق نجاحًا باهرًا والفكرة بتاعت ماندو العدل وهو كان نفسه يطرح القضية دي وهي فكرته من البداية.

– نيللي كريم دائما تختار العمل الذي يحمل رسالة للمجتمع.. هل ده بيكون عن قصد ؟

يعني فيه و فيه.. بمعنى حاجات بتبقى مختلفة.. أنا بعمل شخصيات درامية عميقة بمشاكلهم؛ بأن يكون فيه جوه مسلسل قضية كمان تزود من القيمة، وأعتقد أنه يرجع أيضا للكاتب و لشركات الإنتاج، لأن بصراحة أنا مش بشتغل لوحدي يعني شركة الإنتاج اللي بشتغل معاها أستاذ جمال العدل بيبقى ليه عمل كبير جدا و المخرج طبعا، أعتقد إن أساس فكرة ماندو العدل المخرج هو اللي كان نفسه يطرح القضية دي و يعني المشروع ده أعتقد فكرته الأول وبعد كده أكيد بيتناقشوا على الفكرة و بعد كده يمكن جيت أنا آخر حد.

– “فاتن أمل حربي” خلق حالة من الجدل.. كيف كانت ردود أفعال الجمهور على العمل؟

الجمهور كان سعيد جدًا وكل السيدات فى المنازل دعمتنى لأن العمل يناقش قضية حقيقة وتسعى فاتن لتغيير قانون الأحوال الشخصية لانصاف المرأة وحصولها على كامل حقوقها.

– لماذا نيللي كريم خوض ماراثون رمضان مع المنتج جمال العدل ؟

جمال العدل منتج له رؤية فنية ثاقبة ويختار أعماله بدقة ويبني المشروع بفكره وكتابته ويختار أعمال بناءً على المناخ والعصر الذى نعيش فيه.

المخرج ماندا العدل ونيللي كريم
المخرج ماندا العدل ونيللي كريم

– رأي النقاد.. بتشوفي النقد اللي هو عن دراسة ووعي و بعد مايشوفوا العمل و يبقى نقد بناء ولا الناس اللي بتنتقد بمجرد النقد ؟

فيه وفيه طبعا هو فيه ناس بتنتقد لمجرد النقد.. ناس تدور لك على أي حاجة علشان بس يقولوا و يطلعوا الحاجة ترند ، بس أنا في العموم علاقتي بالنقاد والصحفيين علاقة طيبة لو حاجة مابتعجبهمش، عادي بتقبل ماعنديش عداوة بالعكس احنا على علاقة حلوة ببعض يعني لما بعمل عمل كويس و حلو بيتكلموا عنه كويس أكيد حاجه هتفرحني لو فيه حاجة حسيت إنها ماعجبتهمش ممكن أفهم وجهة نظرهم في الآخر، أعتقد هو بعد ما الناس تتفرج على المسلسل نقدر نتناقش أكتر يعني.

– ما هي رسالة نيللي كريم من المسلسل ؟

أطالب بتغيير قانون الأحوال الشخصية للأحسن بحيث ينصف السيدات وتحصل على حقوقها بالكامل وفيه ستات كثير زي فاتن موجودين فى المجتمع يعانين من بطش أزواجهم.

– شايفة المسلسل ده كقضية مناسبة للعرض في شهر رمضان ؟

أنا شخصيا لما بشتغل مش بحسب المسلسل هيتعرض فين ولا امتى، هو معروف إن شهر رمضان أكتر نسبة مشاهدة فيه، لكن مش بحسبها كده أصل المسلسل و ده لرمضان و المسلسل ده مش لرمضان.. هو يا كويس يا وحش.

– كمشاهدة للمسلسل شايفة إن أنت لما تشوفيه متوقعة إنه ممكن يحصل حلول.. يقدم حلول إزاي مثلا زي فيلم أريد حلا يعمل تعديل في القانون ؟

ياريت يبقي فيه تغيير في القانون يتبص فيه يعني مانهملش ده؛ لأن المرأة دي في الآخر كائن، بني آدم عايش في وسطنا زيها زي إنسان فلديها حقوق وكلها احنا بنتكلم عليها، كل الحاجات الحياتية حقيقة الستات دي كلها بتمر بيها فاتن مش شخصية كرتونية فاتن دي شخصية موجودة، لو أي حد نزل الشارع و ستات هيحكوا لك عندهم مشاكل هما عندهم مشاكل فاتن كلها لو كانت اتطلقت عندها نفس المشكلة الراجل مابيدفعش لا النفقة و بيبقى بالإجبار، و يبقى مابيدفعش مصاريف الأولاد و بيطردها من بيتها و ست بتقعد في المحاكم و مش بتعرف تاخد حقوقها لأن أعتقد القانون لازم ينظر في ده، و مفيش أي عقاب ليه كأنه ماعملش حاجه فيعني هتفضل كده لحد امتى !

نيللي كريم
نيللي كريم

– سن قانون جديد ولا بس تعديل ؟

نيللي كريم: لازم يتعمل قانون جديد و مهما كان الراجل بكل الألاعيب اللي بتحصل ده بتعامل بينه و بين المحاكم لكن مابيتعاملش بينه و بين الست يعني دي وجهة نظري.

– تفتكري ايه سبب ارتفاع معدل الطلاق دلوقت و خصوصا في الجيل الجديد ؟

معرفش طبعا أنا مش أخصائية، بس أعتقد هو فيه عناصر كتير جدا بتبقى ناقصة مش موجودة المعتقد يبقى إن كل حاجة سهلة و كل حاجة متاحة نتجوز، نجرب، نطلق يعني مفيش مسؤولية.

– في نيللي كريم.. المسلسل هيثير الجدل ؟

أكيد هيثير الجدل عندنا ناس كتير أوي و أكيد أكيد هيثير الجدل.

شارك

One thought on “نيللي كريم لـ “الانطلاقة”: كنت على يقين إن المسلسل هيثير الجدل.. وأتمنى تغيير قانون الأحوال الشخصية (حوار)

Comments are closed.