مفيش فرق بين الأصحاء وذوي الإحتياجات الخاصة…حوار خاص مع بطلة العالم لرفع الأثقال فاطمة عمر 

علي الشيخ21 مارس 2021
مفيش فرق بين الأصحاء وذوي الإحتياجات الخاصة…حوار خاص مع بطلة العالم لرفع الأثقال فاطمة عمر 

 

حوار: أحمد الزاهد 

يتشرف موقع الانطلاقة نيوز بإجراء حوار صحفي مع بطلة العالم لرفع الأثقال لذوي الاحتياجات الخاصة المتألقة فاطمة عمر.

 

بطلة العالم فاطمة عمر

_ممكن تعرفينا بنفسك؟

 

انا فاطمة عمر محمد عمر من مواليد 1973م، وبدأت أمارس رياضة رفع الأثقال 1994.

 

_بدأتي تمارسي رفع الأثقال وأنت عندك كام سنة؟

 

بدأت لعبة رفع الأثقال 94، وفي الوقت دا كان أول تكوين منتخب سيدات لرفع الأثقال البارالمبي، وأول بطولة شاركنا فيها كانت عام 97 بسلوفاكيا.

 

وأيضًا كانت بطولة أوروبا المفتوحة، والحمد لله حققت فيها الميدالية الذهبية، ونجحت في كسر الرقم العالمي في هذه البطولة، وهو 67 كجم بعد استطاعتي رفع 100 كجم.

فاطمة عمر

_لية اختارتي رياضة رفع الأثقال بالأخص؟

 

لأن بحس أن فيها روح للتحدي وإثبات الذات، بالإضافة إلى أن المحيطين بي كانوا يعتبرون المعاق إنسانًا ضعيفًا، وكانوا يعتبرون أن الإنسان المعاق لا بد أن يعتمد على من حوله بسبب عدم قدرته في خدمة نفسه ومساعدة الآخرين، وهو ما كنت أرفضه، وكنت حريصة على أن أثبت لهم العكس لأنني كنت أرى أن بداخلي قدرات أستطيع بها خدمة نفسي ومساعدة الآخرين، وأتمتع بالقوة والنشاط غير العادي.

 

_مين أكتر شخص كان بيدعمك دايما؟

 

أكتر شخص كان بيدعمني والدي الله يرحمه وبعد كدا زوجي.

 

_لكل شخص ناجح ليه صعوبات في طريقة.. اي هي الصعاب اللي واجهتك في بداية طريقك؟

 

الصعوبات اللي قابلتني اني ازاي كنت أقدر انجح وأثبت للناس كلها أن مفيش حاجة أسمها ذوي احتياجات خاصة، وأن احنا كلنا زي بعض وأننا نقدر نعمل اي حاجه مختلفة، ودي كانت أكتر الصعوبات اللي قابلتني اني ازاي أنجح وأثبت للناس كلها أن مفيش حاجه اسمها ذوي الاحتياجات الخاصة.

 

_رفع الأثقال أكيد ليه تأثير بالسلب او الايجاب.. اي هي أبرز إيجابيات وسلبيات رفع الأثقال؟

 

بصراحة مكنش ليها تأثير سلبي معايا بل العكس كان كلها إيجابيات ومنها قوة الشخصية وازاي اتعامل مع الناس وازاي اقدر أثبت نفسي في اي مكان وازاي يكون عندي شخصية قوية مخفش من أي حد ودي كانت أبرز الإيجابيات اللي اكتسبتها من رفع الأثقال.

إنجازات فاطمة عمر

 

_اي هي أبرز الجوائز اللي فوزتي بيها؟

 

الحمد لله أعتبر من أفضل رافعي الأثقال في العالم، نجحت في تحقيق 5 ميداليات بارالمبية متنوعة، بواقع 4 ذهبيات وفضية، وهذا الإنجاز لم يستطع أي لاعب أو لاعبة تحقيقه، سواء في الأسوياء أو ذوي الاحتياجات الخاصة، بالإضافة إلى حصولي على أكثر من 15 ميدالية متنوعة ببطولات العالم، وحصولي على لقب أفضل لاعبة في العالم أكثر من مرة.

 

 

_كان شعورك اي لما فوزتي بلقب بطلة العالم لرفع الأثقال لذوي القدرات الخاصة؟

 

طبعاً كنت سعيدة جداً وكان دا بالنسبالي فخر واعتزاز بالمجهود اللي انا عملته ووصلتله لحد ما بقيت بطلة العالم والحمد لله اثبت للناس كلها أن مفيش حاجه اسمها إعاقة وان الإنسان مادام عنده هدف هيسعي ليه لحد ما يحققة، والحمد لله انا وصلتله وأثبت للناس أن مفيش فرق بين الاصحاء وبين ذوي الاحتياجات الخاصة.

 

 

_بتنصحي كل مبتدأ في رياضة رفع الأثقال بأية من وجه نظرك؟ 

 

نصيحتي للشباب عموما سواء الأسوياء أو من ذوي الاحتياجات الخاصة- لا تتوقف عن تحقيق حلمك عند محطة معينة فبالتأكيد بالإرادة والتحدي ستصل إلى حلمك وهدفك.

 

_بتفكري تعملي ايه الفتره الجايه؟

 

بفكر بالتتويج بالذهبية البارالمبية في طوكيو، حتى أختم حياتي الرياضية وأنا على القمة كما كنت طوال الـ25 عامًا الماضية.

الاخبار العاجلة