كتب:علي الشيخ
أشاد الفنان حسام داغر بمسلسل “القاهرة كابول” الذي يشارك من خلاله طارق لطفي في السباق الدرامي لشهر رمضان الحالي.
قام داغر بكتابة بوست من خلال صفحته على موقع التواصل الاجتماعي فيس بوك، يشيد فيه بفريق العمل من الممثلين والإخراج قائلًا: القاهرة كابول مسلسل شيق ممتع من أول الحبكة للحدوته للتمثيل بقالي كتير قوي مستمتعتش بمسلسل عربي كده .. علطول بتفرج على نتفليكس ومسلسلات أجنبية وبحس اني مش بلاقي الجوده أو الإخراج أو الحبكه عندنا زي عندهم.
وتابع مسلسل القاهرة كابول غيرلي وجهة النظر دي وخلاني اشوف ال 8 حلقات اللي نزلوا مره واحده النهارده ..مش عارف اتكلم عن الاستاذ الكبير نبيل الحلفاوي ايه الجمال و الصدق ده، حاسس انه حقيقي لدرجة كل كلامه اقنعني بسهوله بيه ولا الأستاذ خالد الصاوي المبهر السلس الممتع في اداءه السهل وصديقي فتحي عبد الوهاب الي واخد الموضوع بجد و تحسه في تحدي تمثيل في كل كلمه أو نظرة باين ده وطبعا الاستاذ طارق لطفي قد ايه اكتشفت اني بحبك و ان خبرتك فاقت الحدود و دوره ده محدش يعمله غيرك في مصر والقمر حنان مطاوع الي بتعلق بيها من اول ظهورها وتمثيلها بعينيها المليانه بكل المشاعر بتضحك بضحك بتبكي ببكي بتتوتر بتوتر ولا علاقتها بالغة الرقي مع والدها في المسلسل الاستاذ نبيل الحلفاوي و مش عاوز انسي حد وخصوصا احمد رزق الضيف الطيب المؤثر بشدة.
وتابع يمكن أنا اتكلمت عن التمثيل في الأول لانه مجالي اللي بحبه وبفهم فيه وعن إعجابي وتعلقي بيهم لدرجه اني مقمتش من علي الكنبه طوال ال8 حلقات، كإني بشوف فيلم طويل ممتع ومقدرش انكر اعجابي بزمايلي وأصدقائي في المسلسل كريم سرور وخالد كمال ومحمد عز، ومحمد عامر، وامجد الحجار وحسني شتا، ومحمد نصر، وجيهان أنور، ولبني ونس، وأستاذي رشدي الشامي وتلميذي وابني معتز هشام واخوه مؤمن هشام والشاب اللي ادي دور خطيب حنان مطاوع اسف اني مش عارف اسمه.
وانهي مش فاكر مين ولا مين لان مسلسل مفيهوش غلطه بس الفضل في ده يرجع للأستاذ عبد الرحيم كمال لانه كل الجمل والحوار، والحدوته في منتهي العبقريه والجمال باين قوي المجهود فيه في كتابه كل مشهد ولفريق الإنتاج صحابي تامر فتحي وأحمد فرغلي و رجالة سينرجي ولباسم علي و لصديقي المخرج حسام علي، كم انت مبدع انت فعلا عملت عمل هيعيش للأبد..”القاهرةكابول”ادمنته واصبحت في انتظار الحلقة يومياً..بشكركم دمتم مبدعين.
جديرا بالذكر يواصل الفنان حسام داغر تصوير أحداث دوره في المسلسل الكوميدى “أحسن أب”، من بطولة على ربيع، وإخراج معتز التونى، والمقرر عرضه خلال موسم دراما رمضان المقبل، وكشف داغر لـ”اليوم السابع” عن طبيعة دوره، حيث يجسد دور طبيب بيطرى بشكل كوميدى.
“القاهرة كابول” تأليف عبدالرحيم كمال، إخراج حسام علي، بطولة طارق لطفي، خالد الصاوي، فتحي عبدالوهاب، حنان مطاوع، نبيل الحلفاوي، رشدي الشامي، أحلام الجريتلي.
