حوار: منة علام
في البداية نحب نتعرف بحضرتك ؟
محمد ابراهيم عندى 24 سنة بدأت تمثيل من حوالى 5 سنين و انا فى ثانوي بس البداية الحقيقة كانت فى مسرح الجامعه انا طالب فى كلية خدمة اجتماعية جامعة حلوان.
مين شجعك علي التمثيل وهل داخل اسرتك فنانين غيرك؟
موضوع التمثيل جه عن طريق الصدفة شوية انا كنت معظم الوقت مع صحابى بهزر و اقلد ناس من باب الضحك .. و ف يوم صديقتى عرضت عليا انى اروح امثل و روحت و لقيت نفسى مبسوط جدا و مستمتع ف قررت اكمل و اكون ممثل مش اى حاجه تانية لأن انا الوحيد اللى خدت الطريق ده ف العيلة كلها.
ما هو حلمك في الطفوله؟
حلمي إني أكون مهندس طيران
بدايتك كانت في مسرح الجامعه ،حدثنا عن تجربتك علي خشبت مسرح الجامعه؟
فى أول يوم ليا ف الجامعه الجامعة أول حاجه عملتها سألت على مسرح الكلية و روحت و من ساعتها مخرجتش حتى الناس القدام اللى كانوا ف الفريق ها اللى قدمولى الورق ارتبط بالمكان جدا و عيشت فيه سنين تطورت جدا على المستوى التمثيلى و ده بفضل أستاذ «أمير اليمانى» بعد فضل ربنا طبعا مثلت حوالى 6 مسرحيات و اخرجت مسرحية و لسه مكمل ان شاء الله انا ممثل بس جربت مرة أخرج مسرحية و الحمد لله حققت نجاح كويس و خدت 5 جوايز.
ماهي الصعوبات التي واجهتك في بدايتك مع المشوار الفني ؟
بصراحه الطريق كان صعب جدا مازال يعنى.. ضغط الأهل كان شئ صعب جدا و أن فجأة الواحد بقى لوحده بيحارب الناس و الاهل و الظروف و الوقت علشان يقول انا كنت صح ده لوحده شئ مرهق جداً و طبعا العنصر المادى لأن الفن فى بدايته الواحد بيصرف عليه اكتر ما بياخد منه ف الوقت اللى المفروض اللى حولينا بيشتغلوا و يشيلوا فلوس احنا بنصرف على الشغل، و كتير فى شبح بيطارد الواحد انه خلاص يبطل و يبقى انسان طبيعى زى اللى حواليه يصحى الصبح يروح الشغل و يرجع ياكل و ينام علشان تانى يوم عنده شغل بس الحمد لله الواحد وسط كل ده قدر يعدى و يكمل لحد ما حط رجله على أول السلم وأن شاء الله خير و اللى جاى يكون احسن عن كل اللى فات.
ما هو أول عمل درامي مين رشحك لدور وازاي؟
كان مسلسل إلا أنا”حكاية أمل حياتي أستاذ «أمير اليمانى» رشحنى لأستاذ« أحمد حسن» المخرج و أستاذة «حنان مطاوع» كانت داعمه جدا للموضوع و انا اصلا كنت رايح اعمل دور تانى خالص لكن لما أستاذ أحمد و المؤلف الجميل« آمين جمال» شافونى و عملنا اوديشن مع بعض جتلهم فكرة إنى أعمل دور حمادة و فعلا حصل.
بداية انطلاق محمد إبراهيم مسلسل ” إلا أنا ” دور “حمادة” ،،حدثنا عن دور حمادة ،وهل العمل مع الفنانه حنان مطاوع سهل ولا صعب؟
كانت أول تجربة فكانت صعبة شوية و كنت قلقان و متوتر لأنى كنت محتاج أثبت نفسى و أنها تكون بداية كويسة.
حمادة كمان شخصية صعبه شوية و بعيده عن شخصيتى جداً بس ده كان ممتع جدا ذاكرت و اشتغلت و الحمد لله ربنا وفقنى و ادانى اكتر مما استحق.
والشغل مع استاذة حنان مطاوع مريح و ممتع جدا يمكن هى كانت من اكتر الاسباب اللى بتشيل التوتر و الضغط مبهجة جدا في اللوكيشن و بتحتوى كل الناس و خلتنا عيلة كبيرة بنعمل مسلسل و اتمنى أشتغل معاها كتير.
شايف نفسك هتنجح في مجال الدراما أكتر ام الكوميديا؟
انا شايف انى ممثل يعنى اعمل كل حاجه و ان شاء الله انجح ف الإتنين.
لو رجعنا لزمن التمنينات تتمني تمثل مع مين من الفنانين ،ومين مثلك الأعلي في الزمن دا ؟
اتمنى امثل مع عادل امام فى أي زمان و مكان
و حالياً بحب أحمد حلمى و أحمد عز و اياد نصار جداً.
مين الي بيدعمك وجمبك ومؤمن بيك؟
في بدايتي كنت تقريبا كنت لوحدى بس ربنا كان دايما بيبعتلى علامات انى اكمل و كان معايا صحابى فى فريق المسرح كنا دايما بنشجع بعض و نصبر بعض ان الفرصة جاية إنما حالياً ناس كتير .
ما هي نصيحتك لكل من يود أن ينضم لهذا المجال؟
يكمل و يعافر و ممفيش استسلام اجتهد و اتعب و سيب النتيجه على ربنا.
أخيراً حابب تضيف حاجه؟
حابب اشكرك و اقولك انى اتبسطت جدا بالحوار و اتمنالك كل خير و توفيق من الله و ربنا يكتبلنا النجاح و التوفيق و يعاملنا بكرمه و لطفه و مش باللى احنا نستحقه.
